ဖက်ဒရယ်ဦးတည်သည့် စစ်မှန်သော ဆွေးနွေးမှုများ မရှိပါက ၂၀၂၀ သည် ပဋိပက္ခကာလ ဖြစ်လာနိုင်ဟုဆို

ရခိုင်ပြည်နယ်နှင့် ရှမ်းပြည်နယ်တွင် ဖြစ်ပွားနေသည့် တိုက်ပွဲများကြောင့် ယင်းဒေသများ၌ ၂၀၂၀ ရွေးကောက်ပွဲ မလုပ်နိုင်မည်ကို စိုးရိမ်မှုများရှိကြောင်း အမေရိကန်အခြေစိုက် ပဋိပက္ခစောင့်ကြည့်လေ့လာရေးအဖွဲ့(ACLED) က ထုတ်ပြန်သည်။

ထို့အပြင် ကာလရှည်ကြာ တောင်းဆိုခဲ့သည့် တန်းတူညီမျှမှုနှင့် ကိုယ်ပိုင်ပြဋ္ဌာန်းခွင့်ကို တန်ဖိုးထားသော ဖက်ဒရယ်စနစ်ကို ဦးတည်သည့် စစ်မှန်သော ဆွေးနွေးမှုများ မရှိပါက ၂၀၂၀ သည် ပဋိပက္ခကာလတစ်ခု ဖြစ်လာနိုင်ဖွယ်ရှိကြောင်း ဖော်ပြသည်။

ACLED မှတ်တမ်းများအရ ၂၀၁၉ အတွင်း ရခိုင်ပြည်နယ်နှင့် ရှမ်းပြည်နယ်တွင် လက်နက်ကိုင်ပဋိပက္ခများ ပြင်းထန်စွာဖြစ်ပွားခဲ့သည်။

ရခိုင်ပြည်နယ်တွင် မြောက်ဦးနှင့် ဘူးသီးတောင်မြို့နယ်၌ တိုက်ပွဲအများဆုံးဖြစ်ပွားပြီး အကြိမ်ရေ ၈၀ အနည်းဆုံး ဖြစ်ပွားခဲ့သည်။ ယင်းနောက်တွင် ကျောက်တော်၊ ရသေ့တောင်၊ မင်းပြားနှင့် ချင်းပြည်နယ် ပလက်ဝမြို့နယ်တို့၌ တိုက်ပွဲဒုတိယအများဆုံး ဖြစ်ပွားခဲ့သည်။

ထို့အပြင် ရခိုင်ပြည်နယ်တွင် လက်နက်ကိုင်ပဋိပက္ခများနှင့် ဆက်စပ်၍ အရပ်သားများကို ဦးတည်သည့် ဖြစ်စဉ်များ ယမန်နှစ်အတွင်း အကြိမ်ရေ ၁၃၈ ကြိမ်ဖြင့် အများဆုံးဖြစ်ပွားခဲ့သည်။ ယင်းအရေအတွက်သည် ၂၀၁၈ ထက် ကိုးဆခန့် မြင့်တက်လာသည်ဟု စောင့်ကြည့်လေ့လာရေးအဖွဲ့ကဆိုသည်။ ရှမ်းပြည်နယ်တွင်မူ အကြိမ်ရေ ၅၆ ကြိမ်ဖြင့် ဒုတိယအများဆုံးဖြစ်ပွားခဲ့ကြောင်း ACLED က ဖော်ပြသည်။

ရခိုင်နိုင်ငံရေးပါတီများနှင့် လူမှုအဖွဲ့အစည်းများက လက်နက်ကိုင်ပဋိပက္ခများကြောင့် ၂၀၂၀ ရွေးကောက်ပွဲကို ဒေသတွင်း မပြုလုပ်နိုင်မည်ကို စိုးရိမ်ကြောင်း ပြောကြားထားသည်။

ရှမ်းတိုင်းရင်းသားများဒီမိုကရေစီအဖွဲ့ချုပ် ပြောရေးဆိုခွင့်ရှိသူ ဦးစိုင်းလိတ်က ရှမ်းလက်နက်ကိုင်အဖွဲ့ (SSPP/SSA) စိုးမိုးရာ ဒေသအချို့တွင် တိုက်ပွဲများကြောင့်ဆိုကာ ၂၀၁၅ ရွေးကောက်ပွဲကို ရွှေ့ဆိုင်းခဲ့သည်ဟု ပြောသည်။ လက်ရှိ ရခိုင်နှင့် ရှမ်းပြည်နယ်၌ ဖြစ်ပွားနေသည့် အခြေအနေမှာ ပိုမိုဆိုးရွားသဖြင့် ရွေးကောက်ပွဲ ရွှေ့ဆိုင်းနိုင်ဖွယ်ရှိသည့်အပေါ်  စိုးရိမ်ကြောင်း ပြောသည်။

‘‘လွတ်လပ်ပြီး တရားမျှတတဲ့ ရွေးကောက်ပွဲဆိုတာ ဖြစ်နိုင်ပါ့မလား’’ဟု ဦးစိုင်းလိတ်ကဆိုသည်။

ထို့ကြောင့် ဒီမိုကရေစီဖြစ်ထွန်းရေး သက်ဆိုင်ရာအဖွဲ့အစည်းများက ပဋိပက္ခများလျော့ကျစေရေး ဆွေးနွေးရန် ဦးစိုင်းလိတ်က တိုက်တွန်းသည်။